فى البداية الحمد لله طبعا على كل شئ وقدر الله وماشاء فعل
من وجهة نظرى كواحد مشجع زمالكاوى زى اى حد زمالكاوى بقاله 7 سنين نفسه ياخد بطولة دورى عام ومحدش يقولى مهو فى 2008 اخدنا كاس مصر عشان الدورى العام ده هو البطولة فعلا اللى بيبان فيها مجهود اللعيبة وشغل المدربين ومساندة الجمهور على مدار 30 ماتش مش مجرد 5 او 6 ماتشات كاس وبختك يابو بخيت
.
حتكلم شوية على شوية مشاهد كده عدت عليا الموسم ده من غير فذلكة يعنى ولا حقعد احلل بقى ماتشات وتحركات واعمل فيها الشيخ طه ولا فاروق جعفر (بالمناسبة الاتنين دول ومعاهم محمود بكر واحمد الطيب اكتر ناس بتكيفنى لما بيتكلموا على كورة)
وبالمرة كده حقول رأيي فى لعيبة الفرقة وشوية لخبطة بقى فى الاخر وشوية تفاؤل وشوية يأس وحاجات كده استحملونى ولو زهقت
فى النص متكملش ومتقراش الباقى.
طبعا مشروع حسام حسن اللى كل الناس بتتكلم عليه من السنة اللى فاتت وحسام بيبنى فرقة وطلع من المركز ال 13 وعمل فرقة مكونة من لعيبة صغيرة ومفيش امكانيات ونقص فلوس وتخبط ادارى والكلام ده، اه ممكن اكون متفق فى حاجات بس من الاخر يعنى الزمالك فريق بطولة بلعيبة بقى صغيرة ولا عواجيز اللى عرفناه من يوم ما وعينا عالكورة ان الزمالك بيدخل اى بطولة عشان ينافس عليها مش بيدخل عشان يجرب لعيبة او يكمل مشروع حلم فريق الشباب الجميل، الموسم اللى فات ماشى حصل ووقعنا واتبهدلنا ومن بداية الدور التانى مشينا كويس مع حسام وعملنا اللى صعب اى حد يعمله وقلنا ماشى نخلص الموسم واحنا مستوانا كويس وفى امل من الفرقة فى الموسم الجديد وهكذا زى كل سنة بقى.
الموسم الجديد بقى بدأ وهوب يا ريص اول مسامير التفرقة والفتنة جوه الفرقة والزمالك يتعاقد رسميا مع اكبر لعيب بيحب وبيكره نفسه فى مصر الكابتن عصام الحضري بس بقى ماشى يا عم حسام جايبه جون خبرة وكل حاجة واحسن جون فى افريقيا وحيسخن عبد الواحد والكلام ده بس اللى حصل العكس الحضري مضغوط من جبهة اولاد النادى بقيادة عبد الواحد من ناحية والحضري وحسام وابراهيم من ناحية تانية، يا راجل يا طيب ده كان فى ناس فى المدرج بتبقى مبسوطه لما الحضري كان بيخش فيه اجوان، هوب يا ريس مشينا شوية حبة حضري وشوية عبد الواحد ومشاكل وفى الاخر الاتنين مهزوزين بس نتايج الفرقة غطت عالكلام ده وخلصنا اول وكده
الدور التانى بقى الثورة وبقى عند الفرقة حوالى شهرين كاملين استعداد واعداد جديد بقى عشان نكمل الصدارة المهم خير اللهم اجعله خير لقينا موضة الماتشات الودية يالا بينا عالكويت ونرجع عالسعودية نريح يومين ونطلع سوريا طب بالمرة نشوف ماتش ولا اقولك بقى خليها لما نرجع على مصر وشوية تانيين نقوم طالعين السعودية والاوتوبيس يتعطل واجهاد ونرجع نلعب ماتش بعد يومين ونخسر وعادى بقى وكله عادى مع الزمالك.
الدور الاول فضلنا فى قصص وحوارات وبلاد تشيلنا وبلاد تحطنا ونتعادل ونكسب وخسرنا فى الاول والمنافسين مساعدينك بس برضه الفرقة شكلها حلو فى الملعب وبنكسب وكويسين والحياه حلوة برغم كل الظروف والمشاكل الادارية اللى مبهدله كل حاجة فى الفرقة بس حسام قدر انه يعزل الفريق طول الدور الاول.
الدور التانى بقى بعد الثورة وكل اللى حصل وسفريات ومعسكرات وكلام كتير نبدأ الدور التانى ونعدى اول خمس ماتشات برضه زى الدور الاول ونكسب 8 نقط ونخسر 7 نقط ولحد هنا ماشى برضه ان لسه الاول وفجأه بقى الفرقة تسافر واجهاد ونرجع نخسر من الجونة وبعديها بقى نلم نفسينا شوية صغيرين وسط تخبط بقى ونخسر تانى من المقاصة بفعل فاعل بقى ولا من غير مش شماعة اصلا والطبيعى اننا نكسب من غير حاجة.
وبعديها يبدأ التخبط الرهيب ومحدش عارف فى ايه مع اصابات بقى مع ادارة فى منتهى الفشل الاصيل فى اى حاجة وفرحانين بموقع رسمي ابن اختى الصغير يعمل احسن منه والفرقة بقى ولا مستحقات ولا يحزنون وكالعادة تخبط فى الادارة ومئوية شيرين فوزي ومن فشل ادارى لفشل ادراى لفشل فى الفريق وهكذا وعم جلال ربنا يديله الصحه مسابش قناة على النايل سات كله ولا الهوت بيرد ومتكلمش فيها وراديو بقى ومواقع ده كان ناقص يطلع فى قنوات سترايك والخليجية ومزيكا يتكلم .. جتكم الارف كلكوا قرفتونا وحرقتوا دمنا.
يا مجلس يا فاشل دنتوا لو راضعين فشل وخبرتكوا زيرو مش حتعملوا الى انتوا عملتوه، الله يخرب بيوتكو مش عارفين تقيدوا لعيب .. ومين اللعيب احمد حسام ميدو يا نهار ازرق مش عارفين تعملوا ابلود لمستند على سيستم سهل موضوع قيد اللعبة ده .. خخخخخخخخ طب الاول كنا بنقول اصلا الفاكس اصل منطقة الجيزه قافله عشان اجازة شم النسيم لا اصل الموظف المسئول مش موجود بيقدم لابنه فى المدرسة .. انما نظام الكترونى متكامل العالم كله بيتعامل بيه ومش عارفين وبعد كده تقضوها تصريحات وخرف وتضحكوا عالناس .. على العموم المجلس الفاشل ده دوره جاى لسه يعنى ميقلقوش .
حسام حسن : مش عارف بصراحة طب احبك كحسام حسن اللعيب والروح القتال والاصرار والكلام ده ولا اكرهك واتعجب من حسام المدرب وتشكيلاته وتغييراته المش مفهومه ولا اقول معلش معندوش خبره تدريب ونصبر ولا اقول هو اشتغل فى ظروف صعبه فى حدود المتاح من اللعيبه ولا الضغط العصبي اللى حسام صدروا للعيبة هو اللى عمل كده ولا ايه .. مش عارف والله بس حسام لو مشى برضه وساب الفرقة لو المدرب اللى جه بعده معملش حاجة حنتحسر على ايام حسام والروح اللى كانت عند اللعيبة ، ولو اللى بعده ده جه وعمل وسوى حنثبت نفسينا عشان بنحب حسام حسن وحنقول معلش يا حسام انت لو كان عندك امكانيات ولعيبه كنت عملت يعنى مش حنكرهك اوى بس حنبقى من جوانا متضايقين وعواطف جماهير الزمالك حتتغلب على المنطقية ساعتها.
ابراهيم حسن : ابوس ايدك ركز فى الكورة والزمالك بس وبلاش الكلام اللى بيلبسنا فى الحيطة بقى ده وممكن فعلا تكون انت بتتكلم بحسن نيه بس فى الاخر معظم الكلام بضرنا اكتر ما بيفيدنا.
طارق سليمان : ماشى يا عم اهى برضه مصلحه انت رضيت لنفسك انك تكون الراجل اللى واقف ورا حسام حسن وخلاص ماشى .. اهو احسن من وقف الحال برضه
عبد الحليم على : لحد لما مشيت من الجهاز كنت ببقى حاسس انك لما تبقى واقف عالخط اللعيبة مش خايفه منك وبتحترمك وانت بتوجهم فى الملعب
.
عماد المندوه : برغم من انك كان عندك الحضري وعبد الواحد والحمد لله الاتنين عملوا اسوء موسم ليهم بس اللى يشفعلك شوية انك من جواك زمالكاوى ودمك حامى.
وليد بدر : انتى اشتغلى ايه وكان ايه دورك فى موضوع القيد بتاع ميدو ؟؟
عبد الواحد السيد : برغم من حبى ليك على المستوى الشخصي بس فى الملعب انا معرفش ابويا، الحضري جه بدل مالمستوى يعلى قدمت واحد من اقل مواسمك ووصلتنا لمرحلة ان اى فرقة بتلاعبنا بتشوط من 30 ولا 40 يارده عادى واهى ممكن تخش وفعلا دخلت فى ماتش الافريقى وماتش الحرس الدور التانى
فتح الله : الدور الاول ماشى كويس وفجأة الدور التانى نفس القصة برضه ونظام التحليق عالكورة وارجع لوره ومتبيعش نفسك للمهاجم وضربتين جزاء ضاعوا وكور فى حلق الجون مبتدخلش بس يمكن انت احسن من اللى حواليك فى خط الدفاع برغم الهبوط الشديد فى مستواك الدور التانى
الصفتى : طب وايه الحل يعنى يا عمنا قول اللى انت عايزه واحنا حنعملهولك
محمد يونس : هو انت مفيش مرة تاخد الكورة بدماغك او برجلك من غير ما تضرب الشقلباظ اللى انت بتعمله فى الهوا كل شوية ده، شايفك بصراحة كده تتجه للسينما احس
احمد غانم : حدث ولا حرج اعتقد يعنى لو مخانتنيش الذاكره اول اوفر رفعه فى الدورى كان فى الاسبوع ال 26 .
عبد الشافى : المكسب الوحيد الموسم ده الراجل بيعمل اللى عليه وبيطلع كل اللى عنده
صبرى رحيل : خرج ولم يعد بس بصراحه يعنى معذور اللى بيلعب عليه باك لفت مصر القادم
عمر جابر : منعدم الخبره والاتزان فى الملعب ومندفع دفاعيا جدا وهجوميا مش بيركز اصلا محتاج انه يلعب على فترات والناس اللى حواليه هى اللى تشيله.
حازم امام : اتجوزت يا عم ومبسوط ولعبت شوية واتقمصت شوية ماشى خليك اهو ممكن تنفع وييجى منك بصراحة.
احمد سمير : لعبت ماتش كنت كويس اتصبت رجعت تانى لعبت فى مركز مش مركزك بس برضه فى منك امل.
حسن مصطفى : على فترات يا عم الحاج شوية منقدرش نلعب من غيرك ونحس فعلا ان دورك مؤثر وساعات تانية بتبقى اسوء لعيب فى الملعب وبتبقى عبئ على
الفرقة
ابراهيم صلاح : شوية اساسي وشوية بره السكور وشوية عالدكه بس لو تبطل الاندفاع الزيادة ده وتخف من الانذارات حتبقى تامر عبد الحميد التانى بجد.
عاشور الادهم : مينفعش نضحك على مستر كامل ونبدلك وترجع بورسعيد وناخد مكانك احمد مجدى او احمد زهران ؟؟
هانى سعيد : على فترات بصراحة بس لما بتبقى فايق وحاطط الكورة تحت رجلك والفرقة جمبك فايقة بصراحه بتبقى معلم وعارف انت بتعمل ايه.
حسين ياسر : تذبذب رهيب يا عم ياسر لو قطر واحشاك اوى ارجع يا عم عادى.
علاء على : بدايه كانت مبشره واصابات وركنه وقعده بس برضه (ممكن) ييجى منك
احمد جعفر : الجمهور كله مش متفق عليك ساعات بتخلص وبنبقى بنحسر وانت مش موجود واوقات تانية الناس ممكن تخلص علبه سجاير بسببك من حرقة الدم وانت جوه الصندوق.
عمرو زكى : الاصابات الحمد لله خلصت عليك، عايز تحترف ماشى هات فلوس يا عم احنا فى ازمة ويا سلام لو انجلترا برضه ونفس الجو بتاع كل 10 اجوان ناخد فلوس.
ابو كونيه : *$%&@%@&@#$ &(@#$*#$*!* دى بقى شتايم ابيحه
محمد ابراهيم : مشروع جمال حمزة الجديد فى الرعونه والاستهتار وعدم الالتزام والاحساس باى مسئوليه بالرغم من كونك لعيب
ممكن يبقى فيك مستقبل الكورة فى مصر.
حسن يوسف واحمد قطاوى ومحمد رفاعى ويا : انتو مستقبل النادى بس العبوا بروح الجمهور وموتوا نفسيكو بجد عشان انتو
زمالكوية قبل متكونو لعيبة فى فريق نادى الزمالك
ميدو : لو بجد نيتك خالصه انك جاى وعايز تعمل حاجة للزمالك بجد انسي الموسم ده بكل ما فيه وحاول من تانى واصنع التاريخ بنفسك لو مكانش بقى .انت ممكن يا ميدو تسوق نفسك وتروح النادى اللى انت عايزه بالتليفون واكيد حيكون منهم حاجة فى انجلترا وساعتها حيكون معاك الحق لان اللى اتعمل معاك هنا ميتعملش مع لعيب لسه ناجح فى الاختبارات وبنقوله هات صورة شهادة الميلاد و6 صور عشان نقيدك .
جوهرة مصر (شيكا) : نفسي تمشى وتحترف وتكسر الدنيا واوروبا كلها تتكلم عليك وانت قادر على كده وفى نفس الوقت الزمالك عمره ما حيعرف يعوضك اصلا ولا حتى لو جبنا قدامك 3 بلاى ميكر من مصر ولا من البرازيل حتى ، شوف يا عم شيكا مستقبلك وكده كده انت اللى عملته الموسم ده بغض النظر عن اى حاجة يخلى جمهور الزمالك دمعته على خده وهو بيشوف صورك وانت بتمضى فى نادى فى اوروبا بس من جواه فرحان علشانك.
جمهور الزمالك : الحاجة الوحيدة اللى مفيش حد مهما كان انتماؤه اختلف عليها ، النقطة المضيئة الوحيده والمظلومة فى نفس الوقت فى منظومة نادى الزمالك، مهما كان فى وفاء وانتماء فى الدنيا جمهور الزمالك بيغير كل المقاييس دى وبيفضل متفرد عن اى حد فى كل حاجة.
الوايت نايتس : فخور انى كنت واحد من اللى حطوا طوبه فى اساس الكيان ده، ومهما الواحد اتكلم عمره محيديهم 1 % من حقهم.
لخبطه
طب لو كسبنا الديربى مثلا زى مالناس بتقول زى موسم 2003 والفرق يبقى 2 لحد اخر الموسم وفرضنا ان المعجزة حصلت تانى ولو انى معتقدش
هل لعيبتنا حتتحمل الضغط اللى عليها بعد الديربى وحيكملوا حتى لو مكسبوش الدورى يبقى على الاقل معنويا الدورى يخلص بفرق 2 بونط بس ويبقى قدام الجمهور عملوا اللى عليهم؟؟
ولا حيحرروا نفسيهم من الضغوط خالص وحيلعبوا على الاقل معنويا لارضاء الجمهور وخلاص واهو ضغط البطولة يتشال من عليهم ولعل وعسي ؟؟
ولا حيعملو الفصول البارده بتاعتهم ومثلا لو كسبنا الديربى مهو ممكن بعديها يروحو يخسروا من الاتحاد فى اسكندرية وبدل منقول لجمهور الاتحاد حينزل هما اللى يقولولنا راح ؟؟
ولا اصلا جيل 2003 كان اتقل فعلا من الجيل ده وقدر يتحمل وانا واحد من الناس رحت ماتش الاسماعيلى الموسم ده لانى فعلا راضى عن اللى عملته الفرقة الموسم ده برغم من اننا كنا بنسبة 250% خسرنا الدورى بس رحت الماتش لانى اللعيبه قدام مصر كلها عملت اللى عليها وفضلت تنافس لحد اخر وقت فى البطوله ..
ولا ايه ولا ايه ولا ولا ايه .... اهو كلام بقى بيتقال وخلاص ولعل وعسي يمكن كلمتين تلاتة منهم يطلعوا صح واكسر الدنيا ولاقى بقى جورنان ولا قناة عايزنى اشتغل معاهم .. بس من دلوقتى اهو انا مخدش اقل من عشين جنيه
