انت مين فيهم

كان انسان ماشي عادى جدا جدا زى اى حد ولا هو وحش اوى ولا هو كامل من كله اهو كويس الى حد ما, بس الفرق انه كان عنده حاجه بيحبها من صغره ومخلص ليها اوى اوى.

عادى بقى تشيل الدنيا وتحط زى ما بيحصل مع الناس كلها حتى ممكن تجيله كل شوية خبطه من الحاجه اللى بيحبها بس هو مكمل فى حبه ليها ولا نقص مقداره ولا اتغير خالص.

طب ريح شوية يا عم كده وخلى الحاجه اللى بتحبها على جمب دلوقتى مؤقتا وبص بنظرة اكبر ودوس بقى  و فى حلم اهو ممكن يتحقق, وكمان اهو ممكن تبقى حاجه كويسه على المدى البعيد ليك انت والناس كلها والحاجه اللى بتحبها موجوده عندك مش حتطير يعنى.

يالا بينا بقى وبوم طاخ من كل ناحيه وفوق وتحت ولا انت عارف مين مع مين ولا ايه اللى بيحصل بس كده انت دماغك مع المبدأ والحلم اللى انت شايفه صح من الاول ومكمل عشانه.

شالت وحطت بكتير خاااااالص المرادى ومحدش بقى عارف ولا فاهم حاجه من اللى بيحصل وخلاص زهقت.

طب نرجع للحاجه اللى بنحبها واهى كده كده موجوده بس حتى دى كمان واحنا مش واخدين بالنا لوثوها ونفسك تخليها ترجع زى الاول وخلاص.

يا جدعان انا مش عايز حاجه تانى ولا بطلب غير الحاجه اللى كنت بحبها اصلا وشوفوا انتوا عايزين ايه بعيد عنى بقى واتصرفوا مع بعض مليش فيه.

طب اهى الحاجه اللى انت بتحبها كسرهالك خالص بعد لما كانت ابتدت تتشرخ من كل ناحيه ولا خلاك انت اللى تكسرها ومش عايز ولا مش حتقدر ترجعها زى الأول !!

تبص بقى فى المرايه كده وتشوف ايه:

قرون شيطان وعينك لونها احمر وغضبان وعايز تعمل اى حاجه عشان الحاجه بتاعتك اللى انت بتحبها!!

ولا حتشوف حمار بودان كبيره مغلوب على امره قدامك مش عارف يروح فين ولا ييجى منين ولا ايه اللى حصل وهو كان ماله اصلا ومال الناس دى والحكايات دى كلها.

ولا تشوف كلب بنباح حزين وتحس فيه بالوفاء لصاحبه اللى اختفى ومبقاش موجود تانى !!

ولا تشوف طفل صغير مقطع نفسه من العياط عشان ترجعوله الحاجه بتاعته اللى أخدتوها منه !!

      شوف بقى انت مين فيهم ...  

كل الناس بتقول يا رب

مع صوت كلاكسات السيارات المرتفع كالعاده والتى لا يسمعها ولا يعيرها اى اهتمام لوضعه سماعات الاذن وانشغاله بالاستماع الى اذاعة الشباب والرياضه ويدخل الى جلسته المعتاده على المقهى بوجه يبدو عليه التأثر لما يسمعه ويجلس وسط اصدقائة ليقطع تركيزه احدهم وهو ينزع سماعات الاذن عنوه

 ويسأله " ايه النظام ؟ ولا زى كل يوم مش كنا سافرنا الساحل بدل البهدله دى !! "

ليرد عليه قائلا " انا حشرب على حسابك النهارده .. خلاص المصلحة تمت وجبت تذاكر الماتش"

لتتعالى اصوات اصدقائه والكل يرسم ابتسامة النصر بعد الحصول على التأكيد بوجود تذاكر المبارة الفاصلة امام غانا

ويرد احد اصدقائه

 " مش قلتلكوا احنا مش بتوع ساحل فى الوقت ده .. احنا صح .. مشاريبكو كلها النهارده على حسابى "

 ويخرج صديقنا من شنطته الصغيره تذاكر اللقاء وسط انبهار من اصدقائه كأنهم يرون احدى التطبيقات الحديثة لشركة أبل.

 " كل واحد ياخد تذكرته من دلوقتى عشان لو تهنا من بعض واحنا داخلين " وينادى لصبى المقهى " خلاص يا عم تذكرتك اهى وخد اجازة بكره حتيجى الماتش معانا".

استمرت جلسة الاصدقاء الى ما قبل منتصف الليل بقليل كما جرت العاده  ثم يقررون المغادرة استعدادا ليوم المباراة الشاق على ان يتقابلوا فى العاشرة من صباح الغد امام المقهى

 " يا عم مش بدرى كده ده الماتش الساعه 7 بالليل ؟  "

ويرد احدهم " يا عم انت اول مرة تيجى الاستاد واحنا فاهمين اكتر منك .. لسه حنتقابل وعقبال ما نروح وندخل مش قبل الساعه 2 الضهر " .

يعود صديقنا الى منزله منتشيا بالانتصار بعد حصوله على فرصة حضور اللقاء الفاصل ويرن هاتفه المحمول وكان عالطرف الاخر احد اصدقائه من الساحل الشمالى

" مش كنت طلعت معانا ؟ "

 واجابه بنبرة صوت مستهزأه " خلى بقى الساحل ينفعك وانا حشوف مصر بتصعد كاس العالم من الملعب".

بمجرد دخوله الى شقته يستقبله والده بنظره تحمل تساؤل ولكن تاتى الاجابة سريعه

 " خلاص يا حاج التذكره معايا .. مش كنت جيت معايا وحضرت اللقطة التاريخيه دى ؟ "

" طب تعالى اتعشى واتفرج معايا عالتليفزيون .. ده كل القنوات مفيش سيره غير الماتش"

" لا يا حاج حنام خفيف .. بقولك ايه اغنية لؤى اشتغلت ؟ "

" ده لؤى وشيرين وحسين الجسمى وكل حاجه على ماتشات واجوان المنتخب "

" يا مسهل ونصعد " قالها بابتسامه يعلوها الحذر

تشكيل المنتخب النهارده كويس .. هو بس القصة ان الدفاع والباكات يمسكو نفسهم وحسام غالى مع حسنى عبد ربه ومحمد الننى يركزوا وعندك بقى ابو تريكه وصلاح وعمرو زكى تقال قدام والدكه بتاعتنا كويسه فى شيكا واحمد عبد الظاهر واحمد عيد وحسام عاشور ممكن يفرقوا معانا.

" هو الماتش متكهرب بس كده ليه ؟ "

احنا ماشيين كويس وهما مش تقال اوى بس فرق السرعات معاهم "

" يا عم متقلقش احنا روحنا فى كرتين بس تريكه وصلاح يركزوا شوية وعمرو فى العالى حياخد منهم واحده"

" بص فوق كده ؟ "

" ايه ده يا جدع .. ده 120 الف بيشربوا سجاير فى نفس الوقت ... دى ولا السحابه السوده "

" حتخرج فى الاستراحه ؟ "

" لا يا عم .. انت عقبال ما تخرج ونرجع يكون الشوط التانى خلص ومصر فى البرازيل "

ترتفع سخونة المبارة وسط هجمات مرتده خطيره من غانا ولكن العارضه تصدت ببساله وسط ارتباك من حارس المرمى وخط الدفاع.

" يا عم دول تقال اوى .. ده بواتينج اللى كان بيلعب فى الميلان راجع المنتخب مخصوص للماتش ده هو و مونتارى .. انا قلتلك نتيجة 0-0 هناك دى وحشه اهو لو خلص كده حنقعد بقى فى قصة ضربات جزاء "

" يا عم متقلقش بس وقول يارب وهى حتفك فى الاخر "

الدقيقه 88 ولسه الماتش تعادل 0-0 ودربكه فى نص الملعب والننى قطع الكورة من بواتنج ولعب بينيه عالطرف لمحمد صلاح عداها من جمب مونتارى ورايح عالجون بسرعته من الطرف اليمين .. حيعدى من الباك الشمال .. جت على شمال صلاح ورفع عينه فى اتجاه المرمى

" بتاعته دى .. يالا يا صلااااااااااااااااااااااااااح "

جوووووووووووووووووووووووووووووووووووووووووووووووووووووووووووون

" قوم يا ابنى كل ده نوم !! .. انت شكلك اتجننت خلاص .. تليفونك بيرن بقاله ساعه وصحابك واقفين تحت بيقولوا انكوا متأخرين على الاستاد "

نظر الى شاشه هاتفه المحمول ليجدها الحادية عشر صباحا ويقفز مسرعا وفى خلال عشر دقائق يكون امام باب منزله ويقاطعه والده

" ابقى غير ورقة النتيجه وانت نازل "

انتزع ورقة النتيجه ليجد تاريخ اليوم هو الأحد 17 نوفمبر 2013 

" ايه ده يا بابا .. النهارده 17 نوفمبر !! "

" ايوه ماله يعنى ؟ "

" يا بابا ده كانت تاريخ ماتش مصر والجزائر 89 .. ده اول ماتش انت خدتنى معاك الاستاد "

" ياااااااه .. فال خير يا ابنى ده "

" ادعى بس انت هنا مع ماما واختى واحنا حنصعد ان شاء الله "

ملحوظه : كل ما سبق هو من خيال الكاتب ونتمنى حدوثه

كلمة اخيره .. " كل الناس بتقول يا رب " 

-------------------------

"تم كتابته فى سبتمبر 2013" 

شين شباب يا دكتور شرف

فى البدايه كده سامحونى لو حبقى ضيف تقيل عليكوا بس انا ولا طمعان فى شنطة وزارية ولا حاجة .. انا الفترة دى الشنطة المهمة بالنسبالى هى شنطة مستلزمات رمضان للناس اللى محتاجينها وكتر من اى وقت فات.

علاقتى  بالشباب والرياضه بقى قديمه اوى ، من ايام ما كنت بزوغ من كل الحصص فى جميع مراحل تعليمى عشان انزل الحوش العب كوره (زلطه بقى ولا دومه ولا كورة بلاستيك صغيره مكانتش فارقه) لحد لما حققت حلمى ولعبت بالكورة الجلد اللى كنا بنقول عليها زمان كوره كفر .. مش عارف لحد دلوقتى ايه سبب التسميه دى !!

ايام ما كنت ادخل اللجنه الرياضيه بتاعت الفصل ويا سلام على الاجازة  بقى وتضرب طقم الكورة الكامل بالشراب الصوف الطويل ده وماشى فى الشارع بالكورة يا ارض اتهدى ما عليك ادى تقولش رونالدو رايح يلعب كورة ويالا بينا على مركز الشباب والنادى مع ان مفيش فرق بين الاتنين بس لازم كل مكان كان ياخد حقه معايا وقيس بقى على كده كتير ولحد دلوقتى بس مش حقولكوا دلوقتى انا بعمل ايه بعدين بقى ..

كل اللى كنت اعرفه عن وزراة الشباب والرياضه من صغرى هو الرحلات بتاعت الصيف وبيوت الشباب ولو محظوظ تسافر رحلة الاقصر واسوان ولو امك دعيالك بقى يبقى بره مصر .. بس الخلاصه يعنى كله بالواسطه ولازم يبقى ليك حبايبك فى الوزراة

كل الاسماء المرتبطه بالشباب والرياضه اللى علقت فى نافوخى على مدار عمرى كله بتاع 3 اسماء .. دكتور/عبد الاحد جمال الدين، دكتور عبد المنعم عماره، والباشمهندس السيد الاستاذ المبجل المفخم/ حسن بك صقر .. واسمع من قريب كده عن  اللواء/صفى الدين خربوش

شوية يقولك وزارة الشباب والرياضة وشوية يقولك المجلس الاعلى للشباب والرياضه وشوية انفصال التوأم الملتصق ويبقى المجلس القومى للشباب واخوه المجلس القومى للرياضه !!!

طب بعيد عن قطاع الرياضه وال 3 كاس امم افريقيا وميداليات اثينا .. قطاع الشباب كان طالع دوره ايه فى الفيلم بتاعنا اخر 30 سنة ؟؟ اعتقد انه زى الكومبارس اللى مش بيتكلم وبيقعد فى كافتريا ورا اللمبى ونوسه كده !! او ممكن زى فيلم التجربة الدنماركية لما سيادة الوزير دخل مركز الشباب وكان بيجهزوا عشان دخلة فرج الخروف .

هو اصلا انفصال التوأم الملتصق بتاع الشباب والرياضه ليه ؟؟ مراكز الشباب عشان بتاعت الناس الغلابة المسئولية الاكبر للمجلس القومى للشباب انما الاندية الذواتى بتاعتى المبانى الاجتماعيه الشاي والكيك مجلس قومى للرياضه

قوانين بقى مش موجوده حتى فى بلاد تركب الافيال عشان تضمن سيطرة الحكومة على الانديه طول العمر وتحت بند اعانة ودعم الاندية الشعبية اللى بدأت تختفى من الساحة خلاص وكمان خصوصا واحنا داخلين فى الكورة بالتحديد على دورى محترفين وقصة كبيرة اصلا والناس بتاعت الفيفا والكاف مبيهرجوش وصناعة الكورة تحت شعار اللى معهوش ميلزموش .. وللى مش واخد باله ولا نادى فى مصر مهيأ فى مصر للدورى ده غير وادى دجلة ومصر للمقاصه وعلى استحياء كمان.

يا دكتور شرف المنظومة كبيره اوى يا فعلا نسقط النظام العقيم يانفضل ماشيين فى سكة ان لازم الوزير يكون مارس الرياضه وسنه يتعدى ال 60 ولا يمت بصله للشباب او فكرهم او افكارهم، او نفصل بقى القطاعين ويبقى كل قطاع بمهام ورؤية واهداف محددة واشخاص مختصه عندها النيه والقدره على التطوير

الشعب يريد تحرير الرياضه يا دكتور شرف

ستاد فوندو

فى البداية الحمد لله طبعا على كل شئ وقدر الله وماشاء فعل

من وجهة نظرى كواحد مشجع زمالكاوى زى اى حد زمالكاوى بقاله 7 سنين نفسه ياخد بطولة دورى عام ومحدش يقولى مهو فى 2008 اخدنا كاس مصر عشان الدورى العام ده هو البطولة فعلا اللى بيبان فيها مجهود اللعيبة وشغل المدربين ومساندة الجمهور على مدار 30 ماتش مش مجرد 5 او 6 ماتشات كاس وبختك يابو بخيت

.

حتكلم شوية على شوية مشاهد كده عدت عليا الموسم ده من غير فذلكة يعنى ولا حقعد احلل بقى ماتشات وتحركات واعمل فيها الشيخ طه ولا فاروق جعفر (بالمناسبة الاتنين دول ومعاهم محمود بكر واحمد الطيب اكتر ناس بتكيفنى لما بيتكلموا على كورة)
وبالمرة كده حقول رأيي فى لعيبة الفرقة وشوية لخبطة بقى فى الاخر وشوية تفاؤل وشوية يأس وحاجات كده استحملونى ولو زهقت

فى النص متكملش ومتقراش الباقى.

طبعا مشروع حسام حسن اللى كل الناس بتتكلم عليه من السنة اللى فاتت وحسام بيبنى فرقة وطلع من المركز ال 13 وعمل فرقة مكونة من لعيبة صغيرة ومفيش امكانيات ونقص فلوس وتخبط ادارى والكلام ده، اه ممكن اكون متفق فى حاجات بس من الاخر يعنى الزمالك فريق بطولة بلعيبة بقى صغيرة ولا عواجيز اللى عرفناه من يوم ما وعينا عالكورة ان الزمالك بيدخل اى بطولة عشان ينافس عليها مش بيدخل عشان يجرب لعيبة او يكمل مشروع حلم فريق الشباب الجميل، الموسم اللى فات ماشى حصل ووقعنا واتبهدلنا ومن بداية الدور التانى مشينا كويس مع حسام وعملنا اللى صعب اى حد يعمله وقلنا ماشى نخلص الموسم واحنا مستوانا كويس وفى امل من الفرقة فى الموسم الجديد وهكذا زى كل سنة بقى.

الموسم الجديد بقى بدأ وهوب يا ريص اول مسامير التفرقة والفتنة جوه الفرقة والزمالك يتعاقد رسميا مع اكبر لعيب بيحب وبيكره نفسه فى مصر الكابتن عصام الحضري بس بقى ماشى يا عم حسام جايبه جون خبرة وكل حاجة واحسن جون فى افريقيا وحيسخن عبد الواحد والكلام ده بس اللى حصل العكس الحضري مضغوط من جبهة اولاد النادى بقيادة عبد الواحد من ناحية والحضري وحسام وابراهيم من ناحية تانية، يا راجل يا طيب ده كان فى ناس فى المدرج بتبقى مبسوطه لما الحضري كان بيخش فيه اجوان، هوب يا ريس مشينا شوية حبة حضري وشوية عبد الواحد ومشاكل وفى الاخر الاتنين مهزوزين بس نتايج الفرقة غطت عالكلام ده وخلصنا اول وكده

الدور التانى بقى الثورة وبقى عند الفرقة حوالى شهرين كاملين استعداد واعداد جديد بقى عشان نكمل الصدارة المهم خير اللهم اجعله خير لقينا موضة الماتشات الودية يالا بينا عالكويت ونرجع عالسعودية نريح يومين ونطلع سوريا طب بالمرة نشوف ماتش ولا اقولك بقى خليها لما نرجع على مصر وشوية تانيين نقوم طالعين السعودية والاوتوبيس يتعطل واجهاد ونرجع نلعب ماتش بعد يومين ونخسر وعادى بقى وكله عادى مع الزمالك.

الدور الاول فضلنا فى قصص وحوارات وبلاد تشيلنا وبلاد تحطنا ونتعادل ونكسب وخسرنا فى الاول والمنافسين مساعدينك بس برضه الفرقة شكلها حلو فى الملعب وبنكسب وكويسين والحياه حلوة برغم كل الظروف والمشاكل الادارية اللى مبهدله كل حاجة فى الفرقة بس حسام قدر انه يعزل الفريق طول الدور الاول.

الدور التانى بقى بعد الثورة وكل اللى حصل وسفريات ومعسكرات وكلام كتير نبدأ الدور التانى ونعدى اول خمس ماتشات برضه زى الدور الاول ونكسب 8 نقط ونخسر 7 نقط ولحد هنا ماشى برضه ان لسه الاول وفجأه بقى الفرقة تسافر واجهاد ونرجع نخسر من الجونة وبعديها بقى نلم نفسينا شوية صغيرين وسط تخبط بقى ونخسر تانى من المقاصة بفعل فاعل بقى ولا من غير مش شماعة اصلا والطبيعى اننا نكسب من غير حاجة.

وبعديها يبدأ التخبط الرهيب ومحدش عارف فى ايه مع اصابات بقى مع ادارة فى منتهى الفشل الاصيل فى اى حاجة وفرحانين بموقع رسمي ابن اختى الصغير يعمل احسن منه والفرقة بقى ولا مستحقات ولا يحزنون وكالعادة تخبط فى الادارة ومئوية شيرين فوزي ومن فشل ادارى لفشل ادراى لفشل فى الفريق وهكذا وعم جلال ربنا يديله الصحه مسابش قناة على النايل سات كله ولا الهوت بيرد ومتكلمش فيها وراديو بقى ومواقع ده كان ناقص يطلع فى قنوات سترايك والخليجية ومزيكا يتكلم .. جتكم الارف كلكوا قرفتونا وحرقتوا دمنا.

يا مجلس يا فاشل دنتوا لو راضعين فشل وخبرتكوا زيرو مش حتعملوا الى انتوا عملتوه، الله يخرب بيوتكو مش عارفين تقيدوا لعيب .. ومين اللعيب احمد حسام ميدو يا نهار ازرق مش عارفين تعملوا ابلود لمستند على سيستم سهل موضوع قيد اللعبة ده .. خخخخخخخخ طب الاول كنا بنقول اصلا الفاكس اصل منطقة الجيزه قافله عشان اجازة شم النسيم لا اصل الموظف المسئول مش موجود بيقدم لابنه فى المدرسة .. انما نظام الكترونى متكامل العالم كله بيتعامل بيه ومش عارفين وبعد كده تقضوها تصريحات وخرف وتضحكوا عالناس .. على العموم المجلس الفاشل ده دوره جاى لسه يعنى ميقلقوش .

 

حسام حسن : مش عارف بصراحة طب احبك كحسام حسن اللعيب والروح القتال والاصرار والكلام ده ولا اكرهك واتعجب من حسام المدرب وتشكيلاته وتغييراته المش مفهومه ولا اقول معلش معندوش خبره تدريب ونصبر ولا اقول هو اشتغل فى ظروف صعبه فى حدود المتاح من اللعيبه ولا الضغط العصبي اللى حسام صدروا للعيبة هو اللى عمل كده ولا ايه .. مش عارف والله بس حسام لو مشى برضه وساب الفرقة لو المدرب اللى جه بعده معملش حاجة حنتحسر على ايام حسام والروح اللى كانت عند اللعيبة ، ولو اللى بعده ده جه وعمل وسوى حنثبت نفسينا عشان بنحب حسام حسن وحنقول معلش يا حسام انت لو كان عندك امكانيات ولعيبه كنت عملت يعنى مش حنكرهك اوى بس حنبقى من جوانا متضايقين وعواطف جماهير الزمالك حتتغلب على المنطقية ساعتها.

ابراهيم حسن : ابوس ايدك ركز فى الكورة والزمالك بس وبلاش الكلام اللى بيلبسنا فى الحيطة بقى ده وممكن فعلا تكون انت بتتكلم بحسن نيه بس فى الاخر معظم الكلام بضرنا اكتر ما بيفيدنا.

 

طارق سليمان : ماشى يا عم اهى برضه مصلحه انت رضيت لنفسك انك تكون الراجل اللى واقف ورا حسام حسن وخلاص ماشى .. اهو احسن من وقف الحال برضه

عبد الحليم على : لحد لما مشيت من الجهاز كنت ببقى حاسس انك لما تبقى واقف عالخط اللعيبة مش خايفه منك وبتحترمك وانت بتوجهم فى الملعب

.

عماد المندوه : برغم من انك كان عندك الحضري وعبد الواحد والحمد لله الاتنين عملوا اسوء موسم ليهم بس اللى يشفعلك شوية انك من جواك زمالكاوى ودمك حامى.

وليد بدر : انتى اشتغلى ايه وكان ايه دورك فى موضوع القيد بتاع ميدو ؟؟

عبد الواحد السيد : برغم من حبى ليك على المستوى الشخصي بس فى الملعب انا معرفش ابويا، الحضري جه بدل مالمستوى يعلى قدمت واحد من اقل مواسمك ووصلتنا لمرحلة ان اى فرقة بتلاعبنا بتشوط من 30 ولا 40 يارده عادى واهى ممكن تخش وفعلا دخلت فى ماتش الافريقى وماتش الحرس الدور التانى

فتح الله : الدور الاول ماشى كويس وفجأة الدور التانى نفس القصة برضه ونظام التحليق عالكورة وارجع لوره ومتبيعش نفسك للمهاجم وضربتين جزاء ضاعوا وكور فى حلق الجون مبتدخلش بس يمكن انت احسن من اللى حواليك فى خط الدفاع برغم الهبوط الشديد فى مستواك الدور التانى

الصفتى : طب وايه الحل يعنى يا عمنا قول اللى انت عايزه واحنا حنعملهولك

محمد يونس : هو انت مفيش مرة تاخد الكورة بدماغك او برجلك من غير ما تضرب الشقلباظ اللى انت بتعمله فى الهوا كل شوية ده، شايفك بصراحة كده تتجه للسينما احس

احمد غانم : حدث ولا حرج اعتقد يعنى لو مخانتنيش الذاكره اول اوفر رفعه فى الدورى كان فى الاسبوع ال 26 .

عبد الشافى : المكسب الوحيد الموسم ده الراجل بيعمل اللى عليه وبيطلع كل اللى عنده

صبرى رحيل : خرج ولم يعد بس بصراحه يعنى معذور اللى بيلعب عليه باك لفت مصر القادم

عمر جابر : منعدم الخبره والاتزان فى الملعب ومندفع دفاعيا جدا وهجوميا مش بيركز اصلا محتاج انه يلعب على فترات والناس اللى حواليه هى اللى تشيله.

حازم امام : اتجوزت يا عم ومبسوط ولعبت شوية واتقمصت شوية ماشى خليك اهو ممكن تنفع وييجى منك بصراحة.

احمد سمير : لعبت ماتش كنت كويس اتصبت رجعت تانى لعبت فى مركز مش مركزك بس برضه فى منك امل.

حسن مصطفى : على فترات يا عم الحاج شوية منقدرش نلعب من غيرك ونحس فعلا ان دورك مؤثر وساعات تانية بتبقى اسوء لعيب فى الملعب وبتبقى عبئ على

الفرقة

ابراهيم صلاح : شوية اساسي وشوية بره السكور وشوية عالدكه بس لو تبطل الاندفاع الزيادة ده وتخف من الانذارات حتبقى تامر عبد الحميد التانى بجد.

عاشور الادهم : مينفعش نضحك على مستر كامل ونبدلك وترجع بورسعيد وناخد مكانك احمد مجدى او احمد زهران ؟؟

هانى سعيد : على فترات بصراحة بس لما بتبقى فايق وحاطط الكورة تحت رجلك والفرقة جمبك فايقة بصراحه بتبقى معلم وعارف انت بتعمل ايه.

حسين ياسر : تذبذب رهيب يا عم ياسر لو قطر واحشاك اوى ارجع يا عم عادى.

علاء على : بدايه كانت مبشره واصابات وركنه وقعده بس برضه (ممكن) ييجى منك

 

احمد جعفر : الجمهور كله مش متفق عليك ساعات بتخلص وبنبقى بنحسر وانت مش موجود واوقات تانية الناس ممكن تخلص علبه سجاير بسببك من حرقة الدم وانت جوه الصندوق.

عمرو زكى : الاصابات الحمد لله خلصت عليك، عايز تحترف ماشى هات فلوس يا عم احنا فى ازمة ويا سلام لو انجلترا برضه ونفس الجو بتاع كل 10 اجوان ناخد فلوس.

ابو كونيه : *$%&@%@&@#$ &(@#$*#$*!* دى بقى شتايم ابيحه

محمد ابراهيم : مشروع جمال حمزة الجديد فى الرعونه والاستهتار وعدم الالتزام والاحساس باى مسئوليه بالرغم من كونك لعيب

ممكن يبقى فيك مستقبل الكورة فى مصر.

حسن يوسف واحمد قطاوى ومحمد رفاعى ويا : انتو مستقبل النادى بس العبوا بروح الجمهور وموتوا نفسيكو بجد عشان انتو

زمالكوية قبل متكونو لعيبة فى فريق نادى الزمالك

ميدو : لو بجد نيتك خالصه انك جاى وعايز تعمل حاجة للزمالك بجد انسي الموسم ده بكل ما فيه وحاول من تانى واصنع التاريخ بنفسك لو مكانش بقى .انت ممكن يا ميدو تسوق نفسك وتروح النادى اللى انت عايزه بالتليفون واكيد حيكون منهم حاجة فى انجلترا وساعتها حيكون معاك الحق لان اللى اتعمل معاك هنا ميتعملش مع لعيب لسه ناجح فى الاختبارات وبنقوله هات صورة شهادة الميلاد و6 صور عشان نقيدك .

 

جوهرة مصر (شيكا) : نفسي تمشى وتحترف وتكسر الدنيا واوروبا كلها تتكلم عليك وانت قادر على كده وفى نفس الوقت الزمالك عمره ما حيعرف يعوضك اصلا ولا حتى لو جبنا قدامك 3 بلاى ميكر من مصر ولا من البرازيل حتى ، شوف يا عم شيكا مستقبلك وكده كده انت اللى عملته الموسم ده بغض النظر عن اى حاجة يخلى جمهور الزمالك دمعته على خده وهو بيشوف صورك وانت بتمضى فى نادى فى اوروبا بس من جواه فرحان علشانك.

 

جمهور الزمالك : الحاجة الوحيدة اللى مفيش حد مهما كان انتماؤه اختلف عليها ، النقطة المضيئة الوحيده والمظلومة فى نفس الوقت فى منظومة نادى الزمالك، مهما كان فى وفاء وانتماء فى الدنيا جمهور الزمالك بيغير كل المقاييس دى وبيفضل متفرد عن اى حد فى كل حاجة.

 

الوايت نايتس : فخور انى كنت واحد من اللى حطوا طوبه فى اساس الكيان ده، ومهما الواحد اتكلم عمره محيديهم 1 % من حقهم.

 

لخبطه

طب لو كسبنا الديربى مثلا زى مالناس بتقول زى موسم 2003 والفرق يبقى 2 لحد اخر الموسم وفرضنا ان المعجزة حصلت تانى ولو انى معتقدش

هل لعيبتنا حتتحمل الضغط اللى عليها بعد الديربى وحيكملوا حتى لو مكسبوش الدورى يبقى على الاقل معنويا الدورى يخلص بفرق 2 بونط بس ويبقى قدام الجمهور عملوا اللى عليهم؟؟

ولا حيحرروا نفسيهم من الضغوط خالص وحيلعبوا على الاقل معنويا لارضاء الجمهور وخلاص واهو ضغط البطولة يتشال من عليهم ولعل وعسي ؟؟

ولا حيعملو الفصول البارده بتاعتهم ومثلا لو كسبنا الديربى مهو ممكن بعديها يروحو يخسروا من الاتحاد فى اسكندرية وبدل منقول لجمهور الاتحاد حينزل هما اللى يقولولنا راح ؟؟

ولا اصلا جيل 2003 كان اتقل فعلا من الجيل ده وقدر يتحمل وانا واحد من الناس رحت ماتش الاسماعيلى الموسم ده لانى فعلا راضى عن اللى عملته الفرقة الموسم ده برغم من اننا كنا بنسبة 250% خسرنا الدورى بس رحت الماتش لانى اللعيبه قدام مصر كلها عملت اللى عليها وفضلت تنافس لحد اخر وقت فى البطوله ..

ولا ايه ولا ايه ولا ولا ايه .... اهو كلام بقى بيتقال وخلاص ولعل وعسي يمكن كلمتين تلاتة منهم يطلعوا صح واكسر الدنيا ولاقى بقى جورنان ولا قناة عايزنى اشتغل معاهم .. بس من دلوقتى اهو انا مخدش اقل من عشين جنيه 

ايجبشان ايليكشن

قالك انتخابات .. طب تيجى ازاى
تزوير .. خناقات ..رشاوى .. اضرب نار .. اساليب قمة فى القذارة ..يمكن بعد القذارة بشوية بس كتير
وحظى العاثر ساقنى أن اذهب لاحد اللجان الانتخابية والتابعة لعملى وليس محل الإقامة ..طب ليه وازاى ..كده اسهل بقى
مع انى كنت افضل ابقى فى الدايرة اللى تابع ليها محل اقامتى ..على الاقل كنت حبقى مقتنع باللى بعمله
ياه ..اتفضل شوف اسمك فى الكشوفات .. انتو تبع الوزير الفلانى ..طب متقولوا من الاول .. اتفضلو ..وخش وعلم عالشمسية ..
انتهى دورى كناخب خلاص بقى كده ...عملت اللى يمليه عليا ضميرى وواجبى اللى انا مقتنع بيه ..حتى لو انا عارف ان محاولتى دى ملهاش اى فايدة ..بس على الاقل اكون بينى وبين نفسي راضى عن اللى عملته
وبعديها ..متابعات بقى ..على النت ..نشرات اخبار..مكالمات تليفون ..حاجات شفتها بعينى
فى المجمل يعنى من غير تفاصيل ..زى العادة اللى حصل حصل ..وعليه العوض ومنه العوض ...ومفيش فايدة
طب نعمل ايه يعنى ؟؟
نهج ونسيب البلد عشان الناس تنبسط واسمع الكلام بقى بتاع معظم اللى حواليا ؟؟
يا عم احنا حنفضل كده ..مفيش امل ..سافر يا عم وشوف مستقبلك ...
طب منا بحب البلد يا جدعان والله ..بحبها عشان بلدى ... مش عشان اى اشخاص
ولا اقولكو ...انا حفكر فى كلامكو ...لعل وعسي
احنا وصلنا لمرحلة ان الناس لخصت الوطنية فى ماتشات كورة ..وكأن خلاص كله جميل ومنظم وشكله حلو ..فاضل الكريزة بتاعت الوطنية بقى وهى ماتشات الكورة ...وشوية لعيبة الكورة ..فلان وطنى وفلان بيهرب ..فلان مثال مشرف ..وفلان مثال سيئ ..مجدوا وعلوا من قدر فلان ..وحطوا من شأن فلان التانى .. وكتيييييييييييييييييييييير بقى غير الكورة وغير الاعتصامات وغير الوقفات والقعدات وكلام القهاوى والمواصلات والشوراع والاماكن العامة والخاصة
الحالة العامة ...احباط بدرجة زيرو ..فليبقى الوضع على ما هو عليه

بس اوعدكوا يا رجالة يا بتوع خلاص ملناش خير فيها ..نشوف حتة تانية ..كان مثلا الحتة التانية دى اول محتروح حتلاقى كل حاجة خلوة فى استقبالك والخير بيتحدف عليك من كل حتة لحد لما تقول كفاية خير ..عجيبة والله .. بس وعد منى بقى المرادى حفكر جديا فى الكلام بتاعكو ..اهو ممكن نجرب ..وهى الدنيا ايه غير تجارب

ولما نشووووووووووووووووووووف

كورة عالسريع

الواحد شكله قرب نافوخه يضرب وخلاص من الفرقة دى

بقولكو ايه حسألكو حاجة كده .. يمكن انا بس اللى بطلع بفكر فى كده لوحدى

هلى ينفع حد مصاب بتخلف عقلى يلعب كورة ؟؟؟

يعنى بجد مش ممكن اللعيبة دى تجيلها نوبات التخلف دى جوه الملعب ؟؟؟

من رحموة ربنا ولطفه بالواحد ان ماتش الزمالك وانبى كان فى فرده واحدة منهم اللى موجوده

الفردة التانية مصابة .. يا جدعان والله انا ساعات بحس بكده ان فعلا اللعيبة بتجيبلها نوبات تخلف بيسرحو كده وبتجيلهم تهيؤات والله تخليهم يعملو كده ... يا جدعان الناس دى بتقلش بدماغها والحمد لله السوابق ملهاش مثيل وبتتكرر دوريا مع كل اسبوع فى الدورى

طب الى اعرفه واحد اهبل يلعب وراه حديشيله عشان الاهبل ده يدارى فيه انما احنا يا ماشاء الله عندنا الاتنين فى ناحية واحدة

يا خوفى عمرو الصفتى ينقل العدوى للواد عمر جابر .

احنا بقى ربنا موسعها علينا فى الزمالك وعندنا 2 من النوع الده

الصفتى وغانم ... ربنا يحميكو لشبابكو .. ويشفى المتخلفين اللى زيكو

محاولة فاشلة رقم زيرو

بدون مقدمات بقى ورغى وكلام كتير

كل لما اخد قرار انى اكتب فى البتاعة دى اكسل كالعادة زى ما بكسل اعمل حاجات كتير

انا بعتبر نفسي اكسل بنى ادم على كوكب الارض

بس يمكن افلح المرادى

ححاول كل شوية بقى اخش اكتب اللى ييجى على دماغى

بس يارب اواظب